Архитектура - Домашна архитектура

Денеска во „Мала станица“, во рамките на започнатиот „Форум Скопје“ - платформа за урбанизам, архитектура, социологија и филозофија на градот, ќе започне дебата на тема „Скопје - европски град“ на која ќе учествуваат: европарламентарецот и репортер во ЕУ за Македонија, Зоран Талер, холандската амбасадорка Симоне Филипини, преставници од австриската амбасада во земјава, од ОБСЕ и архитектите Иван Мирковски - Туњиен и Антонио Петров (Универзитет Харвард).

Започнат на 24 мај „Форум Скопје“ ќе се одржува до 28 мај во истиот простор, а по неговите две, веќе реализирани успешни изданија во 2008 и 2009 година под истиот наслов „Град на солидарноста“, тој веќе и се етаблира на меѓународната сцена во Европа и во САД како платформа која ги артикулира социоархитектонските промени на физикусот на главниот град. И годинава на него учествуваат странски и домашни стручни лица кои разменуваат информации, знаења и компаративни дискусии.

Изминатите изданија беа посветени на дискусии за современиот дух на западна Европа и северна Америка, а учествуваа стручни лица од Виена, Милано, Берлин, Венеција, Филаделфија, Чикаго, Њујорк, Мадрид, Рим, Токио, домашни учесници и граѓани на Скопје.

Дебатните сесии овозможуваат да се добијат сознанија кои во компаративен манир придонесуваат за изнаоѓање на вистинските прашања и одговори за моменталната состојба во регионот.

---

< Пред		Следно >