Арт

Во НГМ - Мала станица, вечерва во 20 часот ќе се отвори изложба на слики од Стефан Хаџи-Николов.Како што информираат оттаму: "Најновите слики на Хаџи-Николов, како и претходните, претставуваат апсолутна хипостаза на женското тело, на неговата телесна убавина и еротска сензуалност. Тој сега својот ликовен предмет - женското тело го поставува во поимите какви што се минливост и вечност, архаичност и современост, класичност и модерност.

Амбиентот е јасно просторно и временски дефиниран, а женското тело е поставено во нов ентериер како изложбениот простор во „Мала станица“ и куќата на Робевци во Охрид во сликите „Утро во Мала станица“, „Езерото кај Робевци“, „Пладне кај Робевци“. Покрај овие, ќе биде изложена и сликата „Миг и вечност 2“, на која покрај античка скулптура е насликана женска фигура од денешното време. Истата слика ќе биде изложена и на годишната изложба на Друштвото на ликовни уметници на Македонија во декември. Ликовниот стил на Хаџи - Николов е еден вид на модерен класицизам во кој се проткајуваат и надополнуваат естетското и сензуалното.

Стефан Хаџи-Николов е роден 1955 година, во Скопје. Завршил Педагошка академија - отсек ликовно воспитување во 1975 година, а од 1984 година е член на ДЛУМ. Реализирал повеќе од четириесетина самостојни изложби во земјава и во странство и учествувал на повеќе од 100 групни изложби во земјава и надвор од неа.

---

< Пред		Следно >