Арт

Спомен-куќите на Васил Главинов и на семејството Касапови во Велес од вчера се ателјеа на 12 сликари и шест копанирачи од Романија, Србија, Словенија, Бугарија и Македонија. За прв пат од основањето, сликарско - копаничарска колонија "Папрадишки мајстори", која годинава се одржува по шести пат, наместо во селото Папрадиште под Солунска Глава ќе се одржува во Велес, во автентичниот амбиент на староградската архитектура. Општина Велес, која е организатор на колонијата, се одлучи за оваа промена со цел културно да заживеат овие две спомен-куќи.

"Досега имало неуспешни обиди да се стават во функција овие и другите спомен-куќи на поголем број истакнати дејци од Велес. Целта на Општината е тие да почнат да живеат со уметноста и да прераснат во своевидни куќи на уметноста. Уметниците ќе имаат слобода да работат на која било локација во градот и на своите платна да ја насликаат надалеку познатата велешка архитектура", рече Горан Петров, градоначалник на Велес.

Организарите, пак, упатија отворена покана до сите велешки уметници да се приклучат. "Во Велес уметниците има што да насликаат на своите платна и што е поважно целосно да се запознаат со богатата историја и култура на градот на Џинот, Жинзифов, Главинов, Рацин", рече Ангел Коруновски, координатор на сликарскиот дел на колонијата. Колонијата ќе трае до 13 август. Организаторите очекуваат учесниците зад себе да остават поголем број дела, кои традиционално, како и секоја година, ќе бидат изложени во ликовниот салон на Денот на ослободувањето на Велес.

---

< Пред		Следно >